გაეროს უშიშროების საბჭოს საქართველოს საკითხზე გამართული დახურული შეხვედრის შემდეგ, შვიდმა ქვეყანამ რუსეთს მოუწოდა, სრულად შეასრულოს 2008 წლის 12 აგვისტოს ცეცხლის შეწყვეტის შეთანხმება, დაუყოვნებლივ გაიყვანოს სამხედრო ძალები საქართველოს ტერიტორიიდან და გააუქმოს აფხაზეთისა და ცხინვალის რეგიონის ე.წ. დამოუკიდებლობის აღიარება.
შეხვედრა 2026 წლის 20 აგვისტოს, 2008 წლის აგვისტოს ომის მე-18 წლისთავთან დაკავშირებით გაიმართა. ეს არ ყოფილა უშიშროების საბჭოს რეზოლუცია ან კენჭისყრით მიღებული გადაწყვეტილება — შეხვედრის შემდეგ მედიისთვის შვიდი ქვეყნის წარმომადგენლებმა ერთობლივი განცხადება გაავრცელეს.
ვინ შეუერთდა განცხადებას
ერთობლივი განცხადება გაავრცელეს უშიშროების საბჭოს ხუთმა მოქმედმა წევრმა — გაერთიანებულმა სამეფომ, საფრანგეთმა, ლატვიამ, დანიამ და საბერძნეთმა — ასევე საბჭოს 2027–2028 წლების მომავალმა არამუდმივმა წევრებმა, ავსტრიამ და პორტუგალიამ.
Security Council Report-ის ცნობით, საკითხი დახურულ კონსულტაციებზე, „ნებისმიერი სხვა საკითხის“ ფორმატში განიხილეს. საბჭოს წევრებს გაეროს გენერალური მდივნის თანაშემწემ, მოჰამედ ხალედ ხიარმა, ადგილზე არსებული ვითარებისა და ჟენევის საერთაშორისო დისკუსიების შესახებ მიაწოდა ინფორმაცია.
ერთობლივ განცხადებაში ქვეყნებმა კიდევ ერთხელ დაადასტურეს საქართველოს დამოუკიდებლობის, სუვერენიტეტისა და ტერიტორიული მთლიანობის მხარდაჭერა მის საერთაშორისოდ აღიარებულ საზღვრებში. მათ დაგმეს რუსეთის უკანონო სამხედრო ყოფნა ოკუპირებულ ტერიტორიებზე, იქ მიმდინარე მილიტარიზაცია და ანექსიისკენ მიმართული ნაბიჯები.
განცხადებაში ასევე საუბარია აფხაზეთსა და ცხინვალის რეგიონზე რუსეთის „ეფექტური კონტროლის“ შესახებ, ე.წ. ინტეგრაციის შეთანხმებებსა და უკანონო საჰაერო, საზღვაო და სარკინიგზო კავშირებზე. ხელმომწერებმა დაგმეს 2026 წლის 9 მაისს რუსეთსა და ცხინვალის დე ფაქტო ხელისუფლებას შორის გაფორმებული ე.წ. მოკავშირე თანამშრომლობის გაღრმავების ხელშეკრულებაც.
შვიდი ქვეყანა მიესალმა ნაურუს მიერ აფხაზეთისა და სამხრეთ ოსეთის ე.წ. დამოუკიდებლობის აღიარების გაუქმებას და სხვა სახელმწიფოებსაც იმავე ნაბიჯისკენ მოუწოდა. მათ ხაზი გაუსვეს საერთაშორისო ჰუმანიტარული და ადამიანის უფლებათა ორგანიზაციებისთვის ოკუპირებულ ტერიტორიებზე დაშვების აუცილებლობას.
ხელმომწერებმა მხარი დაუჭირეს კონფლიქტის მშვიდობიან მოგვარებას საერთაშორისო სამართლის, გაეროს წესდებისა და ჰელსინკის საბოლოო აქტის საფუძველზე. განცხადებაში ასევე საუბარია იძულებით გადაადგილებული პირებისა და ლტოლვილების უსაფრთხო, ღირსეული და შეუფერხებელი დაბრუნებისთვის პირობების შექმნაზე.
ქვეყნებმა მხარი დაუჭირეს ჟენევის საერთაშორისო დისკუსიების გაგრძელებას, ერგნეთის ინციდენტების პრევენციისა და მათზე რეაგირების მექანიზმის მუშაობას და გალის მექანიზმის დაუყოვნებლივ განახლებას.
